睇戲不離三兄弟

2024年4月25日 - 為二哥送行的早晨活動是去戲院看早場。大哥說得沒錯 - 看電影可說是大家的回憶......

上兩星期，「遠行在即」的哥哥寄來了一大箱東西，話說是包括了兩類東西。一些是要我託管的東西，而另一些是「我會有興趣留低的」東西。

「摩登如來神掌」‥‥「賭神」‥ 

哥哥是一個念舊的人，故也少不了些「出土文物」。在這個連錄影機也難找的年代，與其說是保管錄影帶，倒不如說是保管好那份兄弟間的情懷。

三兄弟小時侯在家中剛有錄影機的時代看過不少電影。在大佬的帶領下，我們看得多亦看得濫。最「熱心」的時候甚至家中備有兩部錄影機。一套戲，租來看一次、「Dup帶」的時候看第二次、Dup了後看無數次。所以一套戲就往往看得滾瓜爛熟。其中以下十套電影，未必是三兄弟看得最多，更不會是三兄弟覺得最好。但它們應該是屬於「最有情懷的」，最能代表屬於我們三兄弟的電影年代。（排名不分先後）

1.《摩登如來神掌》

一 呢套戲要帶一丁點內涵去睇的確很困難。不過，「摩登」戲內有一個笑位我而家都好鍾意….

話說阿叻去做走私，作為朋友既劉華就話：「犯法個喎咁危險你都做？」

然後阿叻嘅回應係：「有嘢危險得過”窮”？」

呢句真係至理名言。

（雖然我不喜歡叻哥，不過要演當下靶位的角色他算是到位。）

2.《專釣大鱷》

小學生就睇「今晚郁你夜唔夜呀？」「裸體蒙面戰士」真係諗起都幾教壊細佬。但回想起來，萬梓良先生演的「臭口全」，那個既膽小又低俗又想充大頭的性格真是叫人拍案叫絕。

經典對白︰「阿媽你仲乜生得我咁大呀‥‥‥」（笑）

3.《賭神》

這套不太需要介紹吧。「賭神」之厲害創了一套戲「雙錄影帶」的先河（即是要租上、下集回家看。）還記得當時三弟兄亦很喜歡用摺疊電話簿扮賭神洗牌。

今時今日睇返呢一段「撩嚟撩去」嘅麻雀對戰感覺有少少「膠」，不過當年我都試過喺屋企攞支筷子同埋「陸軍戰棋」試吓接唔接到。

「越南人？」

「華僑。」

「當個兵？」

「阮文紹時期南越特種部隊第十九連上尉。」

我想最少看過十次，全套戲都是經典。

4. 《咖哩辣椒》

這套戲肯定不是星爺演得最好笑既戲。不過當年二哥開始有錢自己去戲院而我沒有，佢睇完就常常跟我講套戲點好笑所以大家印象都深刻。

時至今講返套戲，阿哥都仲係覺得它是最有 styling 的聖誕節片，好有氣場，又有柯受良同「世小姐」柏安尼。

「大麻成，走啦走啦….（跳欄出大廈外）呢條友仔身手又真係幾好喎。」二哥隨口都講到幾句……

5. 《整蠱專家》

令我最有記憶是過農曆年時跟表哥在荃灣凱旋戲院（即係依家潮江春個位）看的電影。星爺好笑就不用說，淨係吳孟達、成奎安、魯芬、曹查理、程東（即係大軍）其實個個都超經典好笑。

〈賤到星爺都感到吃力個下‥‥‥）

另外，「忌廉血滴子」同「誠實豆沙包」…..誇張奇怪的情節配合很親切的物品，睇十次都仲笑得出就係呢類。（今時今日睇飯戲攻心覺得都有故事都好入屋，但計好笑真係差得太遠。）

6. 《奇蹟》

小時候看成龍，不單是三兄弟，是一家四男子的美好回憶。畢竟男的都喜歡看動作片，成龍雜耍式的表演手法其實是很有創意及富娛樂性。

「我本事太少，同情心太大，成日想同玫瑰夫人……創……造一個奇蹟。你….我不自量力！」

我每次模仿成龍呢一段都會逗得一家發笑，包括當年cool得像龍五的家父。

（這段對白對成龍大哥來講太長，所以對白間有幾個停頓位我肯定他不是刻意演的。不過個導演又無理由要NG大哥咁多次所以由佢照過……我連大哥佢邊個位甩我都記得，所以佢地覺得我扮得好似。）

7. 《A計劃 》(第一集及續集）

又是成龍，第一集有洪金寶及元彪陣容可強得多了，不過個人看第二集的次數更多。

一開場成龍甩底架單車自行埋位個下小雜耍，小孩就是喜歡看這些小把戲。

「打得贏就放你走。」今時今日這種英雄主義也許叫人喝嗤之以鼻，但當年小朋友就係喜歡成龍 "懶勁" 呢一點。。

8. 《急凍奇俠》

呢一套係二哥點名要加入「十大」既電影。

同摩登如來神掌同類既cult片（反派又係元華🤣），內容講元彪同元華都係古代人又來到現代香港打一餐之類，其他內容唔太記得不過我記得…..

「雞，即妓女的俗稱…..」元彪查字典呢幕，仲有呢…..

「姦殺女人，令我開心興奮。」元華呢句咁爆又押韻真係好難唔記得。

兩兄弟提起元華一定想起呢句。

9. 《群龍奪寶》

大佬很喜歡的「鬥智類」‥‥‥呢一套在當年來講都算有點「鬥智」既。不過換作今天劇情就顯得有點兒戲。

呢套野二哥覺得唔太經典，也證明那個時代他在大學比在家的時間多。我在家的時候目測大佬最少睇左呢套野十次，年青時既大佬就係呢類人，覺得好睇既戲就無限loop。堂本剛個套金田一又係，我睇佢「校園七不思議」次數真是多得不可思議。

10. 《拳霸天下》

回憶中唯一的外語片，畢竟當年年紀太小，接觸外語片機會不多，Top Gun大熱又未太懂欣賞。

拳霸不是Tony Jar 而是尚格雲頓在九龍城騫拍得那一套。幾位小朋友都是被腳踢到上頭頂的功夫所吸引，而且西片用香港做background，在當年外國人懶理華人市場的時代是很少有的事。

「細佬走左之後恐怕沒多機會一起看戲，不如三兄弟約出來看場戲？」大哥見二哥臨行，感性癌又發作了。（講到好珍惜咁，但其實我地三人上次一齊入戲院睇戲，要數到十年前投名狀。真係咁珍惜就唔會最後幾日先提議一齊睇戲啦？）

「送行不就是要搞些多點對話的活動嗎？」我的理性就是這樣理解，不過決定請半天假盲撐大佬一次。三兄弟性格雖然很不同，但多少都有容讓自己感情用事的那份率性。

我本想在送別二哥前兩天一起看一套「但願人快久」應下景，但由於二佬指明想看的「填詞L」……

「二哥叫到就睇咩L都睇啦。」不過阿哥只得上午有空，快要落畫的它全港亦只有高仙電影中心才有早場。

呢間「高仙」係邊呢？ 港島

二佬臨走係大晒既，堅尼地就堅尼地。

「填詞L」……一套以追夢為題的戲，內容卻描寫得很踏實，很值得「細嚼」的一套小品。這套戲我給了不少「共鳴分數」，畢竟自己年少時都有過當「填詞人」的夢。另一方面，「難得我耗光一世努力才放棄…」15年了，其實我也算是一個「Blog L」。

「誰保證熱血可兌換動人結尾？」

故事有反低潮卻沒有反高潮，也許就正是追夢而要面對夢醒的大多數人的寫照。

三個人去看早場: 有一個整夜工作後仍沒有睡覺、另一個兩日後要遠走又未執行李，加上一個月尾要下午趕回公司工作, 三個人多少也有羅穎詩那份不計成本的態度。所以大家都覺得「值得」。

時至今日一套再好的戲也很難花精神看兩次。畢竟時間太少、選擇太多。所以當年那份不停LOOP的情懷是不易複製的。

下次三人再一起睇戲會是何時？天曉得。

不過，二哥請放心，那些錄影帶，跟那些附帶著的回憶，我都會好好保存的，因為我們都是一個「念舊L」。